9/7/2007 - Si raportuan gazetat shqipe për vrasjen e Triumf Rizës

Si raportuan gazetat shqipe për vrasjen e Triumf Rizës

PA GAZETARË TË GUXIMSHËM LUFTA KUNDËR KRIMIT NUK MUND TË JETË E PLOTË

Fakti që disa gazeta kanë shkruar për këtë ngjarje dhe rreth kësaj ngjarjeje më gjerësisht në ditën e pestë dhe në ditën e gjashtë pas krimit, se sa në ditën e parë të krimit tronditës, tregon se planifikuesit e temave në ato redaksi, kanë dështuar plotësisht dhe nuk e kanë të qartë rëndësinë që ka mbulimi i temave për krimin.

Dr. Milazim KRASNIQI

 Raportimet në mediat shqipe në Kosovë, për vrasjen e policit të njësive etite të Shërbimit Policor të Kosovës, Triumf Rizës, e cila ndodhi më 30 gusht 2007, tregojnë një ndryshim që ka filluar të ndodh në disa media.

Viktima e këtij krimi të shëmtuar, polici i njohur dhe mund të thuhet edhe i popullarizuar në mesin e  rinisë prishtinase, Triumf Riza, ka qenë një shembull i policit të guximshëm e të vendosur që ta luftojë krimin dhe kriminelët. Guximi i tij ka mbjellë shpresë e siguri te qytetarët e Prishtinës dhe veçmas te rinia e kryeqytetit.

Triumf Riza ka qenë në të njëjtën kohë simbol i rinisë urbane, një djalë kryeqytetas, i lidhur me shumë pjesëtarë të estradës, duke përfshirë edhe lidhjen me një këngëtare të njohur. Prandaj, tronditja e publikut nga kjo vrasje, ka qenë e jashtëzakonshme, gjë që dy gazeta me profil urban, Express, dhe Koha Ditore, e kanë kuptuar me kohë. 

Gazeta Express

Gazeta “Express” e ka raportuar vrasjen e Triumf Rizës si ngjarjen kryesore të ditës, me një foto të madhe në ballinë dhe me një titull të madh, “ Krimi kundër Triumfit”, i cili në këtë formë shpreh një lloj familjarizmi me viktimën, duke e prezantuar si të gjithënjohur për publikun. Raporti i gazetares Sara Rexhepi në faqen tetë, me dy fotografi nga vendi i krimit, dhe me titull “Plumba për Triumfin”,  i ka karakteristikat e një raporti mjaft më gjithëpërfshirës. * 

Koha Ditore

Gazeta Koha Ditore, e njohur në shtypin ditor të Kosovës si gazetë me standard të lartë profesional, i kushton kësaj ngjarjeje një raport të gjerë në faqen pesë.  Me mbititullin, “Atentat në lagjen “Dardania të Prishtinës” dhe me titull “Vritet polici i SHPK-së, Triumf Riza”, raporti është i ilustruar me portretin e madh të viktimës dhe me një fotografi nga vendi ku është kryer krimi.

Kosova Sot

Gazeta “Kosova Sot” e boton në faqen 9 , në rubrikën “Kronika e zezë”, një raport për vrasjen e Triumf Rizës, ndërsa teksti është i mbuluar nga një sërë lajmesh të shkurtëra, ku bie në sy edhe titulli “ Polici sillet me arogancë ndaj eprorit të TMK-së”, gjë që tregon mungesën e sensit të redaktorit të kësaj rubrike. 

Infopress

Gazeta “Infopress”, e ka paralajmëruar raportin për vrasjen në faqen e parë, në faqen 2 ka botuar një koment lidhur me krimin, ndërsa në faqen 11 është raporti për vrasjen e Triumf Rizës. Gazetari Bekim Kabashi e nis raportin në mënyrë korrrekte, duke e theksuar emrin dhe mbiemrin e  viktimës, vendin dhe kohën e vrasjes.Por, paragrafi i dytë është i plasuar aty pa vend, sepse nuk është fare relevante se a ka qenë në detyrë apo nuk ka qenë në detyrë polici i vrarë. Relevante në këtë rast është çfarë thotë përfaqësuesi i policisë, i prokurorisë dhe të spitalit e edhe dëshmitarët. Gazetari i ka plasuar deklaratat e dëshmitarëve para atyre të zëdhënësit të policisë, gjë që nuk është praktikë e mirë. Gazetari i është referuar një konflikti të hershëm të viktimës me Enver Sekiraqën në “Sviss casino”, gjë që më vonë rezultoi se ishte pista e motivimit të krimit. Poashtu, gazetari i referohet edhe lidhjes së viktimës me këngëtaren Adelina Ismaili, që poashtu rezultoi të ishte një lidhje e vërtetë. Pra, ky raport i ka disa elemente esenciale, që janë të lidhura me krimin e ndodhur.       

Gazeta “Zëri”

Gazeta “Zëri” boton në faqen 5 një raport për vrasjen, i cili ka titullin “ Në qendër të Prishtinës vritet polici i SHPK-ë, Triumf Riza”. Gazetari Visar Fetaj e fillon raportin, duke e vënë theksin te koha kur ka ndodhur vrasja: “ në pikë të ditës dhe në qendës të Prishtinës”, ndërsa në këtë rast rregulli e do që në fillim fare të tregohet kush është viktima. Raporti është i mbushur me referime në deklaratën e zëdhënësit të policisë,  ka edhe një referim të zbehtë në deklaratë dëshmitarësh, por jo e specifikuar. Raporti është i pasuruar edhe me një fotografi nga akti  ndezjes së qirinjve në vendin e krimit dhe me një portret të viktimës.

Gazeta “Lajm”

Gazeta Lajm sjellë në faqen 8 një lajm të shkurtër për vrasjen e Triumf Rizës,  në fund të faqes, ndërsa sipër tij është një raport i gjerë me titull “ Studentët: Pacolli, investuesi më i madh në arsim”, si promovim i figurës së botuesit të kësaj gazete. Minimumi është se edhe në këtë rast redaktori i kësaj faqeje ka pasur mungesë të etikës profesionale.

Gazeta ‘Bota Sot” boton një lajm të kompiluar në redaksi, krejt joadekuat me peshën dhe me përmasat e ngjarjes.  

RAPORTIMI NGA VARRIMI I TRIUMF RIZËS

Gazeta Express

Raportimi nga varrimi i viktimës, në gazetën Express sërish është i gazetares Sara Rexhepi, që  do të thotë se është e njëjta gazetare që ka raportuar edhe për vrasjen, gjë që është shenjë e qasje profesionale të kësaj gazete. Tirulli i raportit “Përcjellja e fundit për Triumfin”,  sërish e ruan intonimin familjar, intim dhe identifikues me atmosferën e përgjithshme të pikëllimit. Raporti është i intonuar me pëshkrime autentike të atmosferës, të udhëtimit e të fjalimeve, në mënyrë mjaft profesionale. I pasuruar edhe me foto të mëdha nga ngjarja, ky raport është një model i mirë i gazetarisë profesionale. 

Gazeta Express në të njëjtën ditë ka edhe një tekst të gazetarit Nebi Maxhuni, në të cilin aktualizohen përpjekjet e policisë për kapjen e autorëve të krimit. E vetmja qasje joprofesionale mund të konsiderohet  dhënia e plotë e emrave të të arrestuarve dhe atyre që janë në kërkim. 

Gazeta Koha Ditore

Raporti i gazetarit Zija Miftari, i shkruar sipas modelit alternativ dhe jokronologjik, e jo sipas piramidës së përmbysur, është shumë i gjetur dhe në pajtim të fortë me peshën e ngjarjes. Ja si e fillon raportin ky gazetar: “ Agnesa, vogëlushja 4 vjeçare, assesi nuk pajtohej me faktin se  të premten në varrezat e fshatit Stagovë të Kaçanikut, po ndahej përfundimisht nga xhaxhai i saj, polic Triumf Riza. Vetëm të qarat e saj  e prishnin qetësinë e mbi 3 mijë njerëzve që ishin mbledhur  në një fushë afër varrezave, për t’ia dhënë lamtumirën e fundit Triuf Rizës, i vrarë të enjten”.  

Ky raport mund të jetë si model për një gazetari profesionale.  I pasuruar edhe me katër fotografi në tërë faqen 7, raporti i ofron publikut një informacion të plotë dhe efektiv për këtë ngjarje.    

Gazeta Kosova Sot

Raporti i gazetares Luljeta Humolli është i ngarkuar me përshkrimin e atmosferës në familjen e të ndjerit, pasatj thuhen disa fjali për arrestimin e tetë personave, ndërsa për varrimin, atmosferën, fjalimet, nuk ka asnjë fjalë, (edhe pse mbititulli është “ Triumf Riza u varros me nderime të larta policore”. Këto mungesa kanë ndodhur sepse  gazetarja, sipas gjasave,  nuk ka shkuar fare në vendin ku është bërë varrimi.  

Gazeta Zëri

“Zëri” më datën 1 shtator 207 boton në faqen 5 një raport me mbititull “Prishtina  jep lamtumirën e fundit policit Triumf Riza, i cili varroset në Stagovë të Kaçanikut” dhe me titull “ Varroset polici Triumf Riza, në  arrest mbahen tetë të dyshuar për vrasjen e tij”. Gazetari Visar Fetaj, e fillon raportin me një “”kre rezymues”, që është mjaft i thatë: “ Polici i ndjerë Triumf Riza është përcjellë të merkuren nga Prishtina për në banesën e fundit në Stagovë të Kaçanikut”. Sintagma “për në banesën e fundit” është krejt e pashije në këtë kontekst, sepse varri nuk mund të quhet banesë, as në poezi e lërë më  një një raport gazete.

Pastaj fillon me përshkrimin më korrekt të atmosferëns në lagjen Dardania dhe në familjen e të ndjerit. Më vonë gazetari “raporton” për hetimet e policisë dhe e mbyll raportin me një informatë për numrin e  policëve të vrarë brenda këtij viti. Nga materiali i botuar del qartë se gazetari nuk ka qenë fare në vendin e ngjarjes, ku është bërë varrimi i të ndjerit, sepse nuk ka asnjë citim nga fjalimet që janë mbajtur atje dhe as nga atmosfera e varrimit.     

Gazeta Infopress

Raportin për ditën e varrimit të viktimës Triumf Riza, e ka bërë sërish gazetari Bekim Kabashi. Në pjesën e parë të raportit përshkruhet atmosfera në lagjen Dardania, pra para nisjes së kufomës për në fshatin Stagovë, ku u bë varrimi. Në pjesën e dytë, raporti fokuson hetimet lidhur me vrasjen. Ndërsa në fjalinë fundit tregohet se trupi i pajetë i viktimës u nis drejt vendlindjes së të afërmve të tij. Pra, shihet qartë se gazetari nuk ka qenë në vendin ku është bërë  varrimi, sepse nuk janë përfshirë as atmosfera e atjeshme, as fjalimet e mbajtura atje.     

Gazeta Bota Sot 

Kjo gazetë boton në faqen 3 një lajm të kompiluar e konfuz, ku nuk raporton për varrimin e Triumf Rizës, po për aksionin e policisë për kapjen e dorasit. Në lajm përsëritet gati fjalë për fjalë lajmi i një dite më parë, i cili ishte i sigluar me B.S.. Vetëm në fjalinë e fundit, bëhet përpjekje të thuhet diçka për varrimin, por edhe kjo bëhet në një konfuzion të çuditshëm:  “ Ceremonia për funeralin do të bëhet për oficer të rënë në linjë të detyrës, ndërsa varrimi i tij u bë pasdite me nderimet më të mëdha në fshatin Stagovë të Kaçanikut, në të cilin morën pjesë personalitete të larta udhëheqëse të institucioneve të Kosovës dhe qytetarë nga të gjitha anët e vendit dhe me lot në sy i dhanë lamtumirën e fundit (R. Asllani) “

Nuk është e qartë se çfarë ka dashur të kumtojë gazetari kur thotë “ ceremonia për funeralin” dhe më vonë flet për varrimin, pastaj thotë se morën pjesë personalitete ndërsa nuk e përmend asnjë. 

Në faqen 5 Bota Sot boton reagimin Zyrës së kryeministrit (me inicialet L.H) dhe të Partisë Aleanca për Ardhmërinë e Kosovës (me inicialet b.s). 

Gazeta Epoka e Re

Kjo gazetë ka transmetuar një raport të radios Europa e Lirë (!) dhe një tekst të huazuar nga “Gazeta Shqiptare”, për  lidhjet e Adelina Ismailit me të ndjerin. Në fund përmendet varimi i të ndjerit. Gjithsesi një tekst joadekuat dhe jo në momentin duhur, sepse dita e varrimit në këso situatash duhet të mbulohet me raportim nga vendi i ngjarjes dhe me një intonim sa më serioz.

Gazeta “Lajm”

Gazeta “Lajm” nuk ka botuar asnjë rresht nga varrimi i viktimës, Triumf Riza, gjë që bën edhe më të rëndë dështimin profesional të kësaj gazete në këtë rast dhe që ngre dyshime për ndonjë motiv të fshehtë të injorimit të kësaj ngjarjeje nga ana e kësaj gazete.    

DITA E TRETË E RAPORTIMEVE-ARRESTIMET

Në ditën e tretë, raportimi i mediave u fokusua në arrestimin e të  dyshuarve për vrasjen e Triumf Rizës, e konkretisht në dorëzimin e të dyshuarit kryesor, Arben Berishës. 

Expressi në faqen 8 me titull të madh “ Dorëzohet Arben Berisha”, vazhdon ta mbajë këtë ngjarje lart në agjendën e vet, duke iu përgjigjur interesimit të publikut për të.

Koha Ditore në faqen 5 e ka sërish një raport të Zija Miftarit, gazetarit që ka raportuar edhe nga varrimi i Triumf Rizës. Raporti i Zija Miftarit i plotëson standardet profesionale, sepse është i bazuar në burime, përdor inicialet e të arrestuarit, citon kumtesën e policisë, evokon vrasjen që ka ndodhur dy ditë më parë dhe përfundon me informacionin se policia është në kërkim edhe të Enver Sekiraqës dhe se dyshohet se vrasja ka ndodhur për hakmarrje.

Kosova Sot sërish ka një lajm të shkurtër e të panënshkruar, në rubrikën “Kronika e zezë& Marketing”(!), emërtim krejt i  papërshtatshëm për  këtë rast.

Bota Sot lajmin për arrestimin e të dyshuarve e jep më 2 shtator në një lajmin të kompliuar me tri fjali! Të firmosura me V.K. Rezulton se të gjitha janë përpunime në redaksi dhe se asnjë gazetar i gazetës “Bota Sot” nuk i ka përcjellë ngjarjet më tronditëse të Kosovës më 30, 31 gusht dhe më 1 shtator 2007.    

Infropress ka një raport të shkurtër në faqen 9, ku theksi kryesor bie në interesim e policisë për ta intervistuar Enver Sekiraqën, një person për të cilin thuhet në tekst se i ndjeri Triumf Riza ka pasur konflikt në vitin

2005.               

Gazeta “Zëri” sjellë në faqen 2, të numrit të së hënës të datës 3 shtator 2007 (meqë nuk del të dielen), tekstin e Visar Fetajt për arrestimet që ka bërë policia. Në këtë tekst përmendet burime të paidentifikuara policore, por edhe referimi në konfirmimin e Veton Elshanit për arrestimin të dyshuarit kryesor, për bastisjen e lokalit të Enver Seliraqës dhe për armiqësinë që ky ka pasur ndaj të ndjerit, e që është pistë e hetimeve. Edhe nga ky raportim shihet se gazetari e di zanatin, por nuk e njeh sektorin, prandaj shkruan në mënyrë standarde,  pa elementë pikantë, pa burime të tjera, përveç të policisë.   

ÇKA NA TREGON ANALIZA E RAPORTIMEVE PËR VRASJEN 

Gazeta Express:

Pas hyrjes kryesisht profesionale, raporti vazhdon me disa informata që nuk e kanë vendin në krye të tij: (informata se viktima nuk ka qenë në detyrë, referimi në të dhënat e dëshmitarëve për momentin e krimit). Logjikisht, menjëherë pas hyrjes, duhet të vinte deklarata e zyrtarit të SHPK-së, (Veton Elshanit), pastaj informacioni ng Qendra Klinike Universitare, ku është konfirmuar vdekja e viktimës, e më vonë të dhënat e selektuara nga dëshmitarët. 

Koha Ditore: 

Në kreun e raportit do të duhej të përfshihej koha e vrasjes, vendi ku është kryer vrasja, e jo theksimi i hetimeve të policisë. Poashtu, paragrafi i tretë, nuk e ka vendin fare aty, sepse ai duhet të ishte nga fundi i raportit. Edhe paragrafi i katërt, i cili i referohet një deklarate të paidentifikuar lidhur me punën dhe përkushtimin e të ndjerit në ndjekjen e hajnave, duhej të ishte shumë më poshtë në raport. Përshkrimi i miqve dhe i familjarëve të të ndjerit në QKU, poashtu është i dhënë tepër  lart në raport,  sepse sai duhet të jipej pasi të jetë konsumuar deklarata e zyrtarit të policisë dhe e mjekëve të QKU-së.

Raporti mbyllet me theksimin e fortë të telegramit të ngushëllllimit që Veton Surroi i ka bërë familjes së të ndjerit. Hapësira e gjerë e telegramit,  mund të kuptohet si një veprim politik, i cili në kësi vendi dhe në këso rrethanash, pavarësisht qëllimit të mirë që mund të ketë, nuk është  profesionalisht i arsyetueshëm. 

Kosova Sot:

Raporti  i kësaj gazete është joprofesional deri në fund, një shembull i improvizimit të palejueshëm gazetaresk. Ja si fillon raporti: “Në lagjen Dardrania, në Prishtinë,  në parkingun “Flamurtari”,  që gjendet prapa banesave “ te Santea”, ka pasur të shtëna me armë zjarri me ç’rast persona tash për tash  të panjohur kanë vrarë pjesëtarin për intervenime të shpejta të SHPK-së, Triumf Riza”.  Lënia e emrit të viktimës në fund të kreut të raportit, pas numërimit të tri lokacioneve ( !!!),  tregon se gazetarja dhe as redaktori nuk kanë njohuri elementare për këtë formë të raportimit, ku emri i një personaliteti të njohur, që është vitimë, nxirret në krye të tekstit.    

Gazeta “Zëri”

Është një raport rutinë, si për çdo ngjarje tjetër, që do të thotë se as redaksia e as gazetari nuk e kanë pasur idenë e peshës së krimit të ndodhur dhe të zhvillimeve që do të pasojnë si reagim qytetar ndaj krimit. Bindja ime është se gazetari nuk është i specializuar për mbulimin e këtij sektori, por aty është gjuajtur në momentin kur ngjarja ka ndodhur.

“Bota Sot”

Gazeta ‘Bota Sot” e paralajmëron temën në faqen e parë me titull “ “Vritet Triumf Riza, pjesëtar i SHPK-së”, ndëra në faqen 2 është një lajm i shkurtër, i sigluar me B.S., sipas të gjitha gjasave i sajuar në redaksi, nga ndonjë përpunues lajmesh.

Kreu i lajmit është kështu: “ Zyrtarë të SHPK-së thanë se në ora 15,45, në parkingun “Flamurtari”, prapa banesave “Te Santea”, është shtënë me armë zjarri nga persona të panjohur, në një pjesëtar të SHPK-së i cili është dërguar në Qendrën Klinike Universitare  ku mjekët kanë konstatuar vdekjen e tij”.

Nga ky kre i lajmit nuk mësohet gjëja më e rëndësishme, kush është personi i vrarë. Nuk mësohet as kush është personi i policisë, i cili ka dhënë deklaratë për policinë, veçse thuhet “zyrtarë të policisë thanë se...” çka lë të kuptohet se kanë qenë disa zyrtarë që kanë folur për këtë ngjarje, gjë që nuk është e vërtetë.

Në paragrafin e dytë thuhet se “ nga këto të shtëna është plagosur Triumf Riza i lindur më 7.05. 1979, ndërsa vdekja e tij është konstatuar nga mjekët”, që është një fjali krejt e kotë.

Në paragrafin e tretë thuhet se “Veton Elshani, zëdhënës i SHPK-së, tha e policia është e informuar për rastin dhe ka dalë në vendin e ngjarjes ku po qëndron edhe tani për të marrë të dhënat e duhura lidhur me incidentin që ka pësuar një pjesëtar i saj.“

Pasaktësitë në këtë paragraf janë skandaloze, përfshirë këtu edhe fjalën “incident”, e cila në rastin e vrasjes së një zyrtari të lartë të organeve shtetërore, është krejtësisht joadekuate.

Në paragrafin pasues thuhet se “Ai bëri të ditur se autorët e krimit ende nuk janë kapur dhe SHPK po punon në këtë drejtim”. Nëse mirret kuptimi logjik i fjalëve, kjo fjali lë të kuptohet se policia po punon për moskapjen e autorëve të krimit!!!     

Lajmi te “Bota Sot” mbyllet me këto fjalë: “ Triumf Riza ishte pjesëtar i SHPK-së dhe shërbente në Njësitin e Mbrojtjes së Përafërt me seli në Prishtinë, ndërsa gjatë kohës kur ka ndodhur krimi,  i ndjeri ishte jashtë detyrës. (B.S). Pra, asgjë me vlerë për informim adekuat të publikut.

Gazeta  “Lajm”:

Teksti që boton kjo gazetë është skandaloz, kur shihet në kontekstin e peshës që ka ngjarja për Kosovën. Prapavija e këtij qëndrimi nuk na është e qartë, por është një joprofesionalizëm ekstrem.

Analiza e raporteve për këtë krim, tregon se është eliminuar retorika propagandistike e viteve të para të çlirimit të Kosovës, (1999-2003), por nuk është zëvendësuar nga organizimi plotësisht profesional i raporteve. Gazetat Express dhe Koha Ditore kanë raporte të gjera dhe më profesionale, Infopress ka raporte korrekte, por tema nuk trajtohet me përparësi,  “Zëri” boton raporte rutinë, “Kosova Sot” dhe “Bota Sot” raporte të kompiluara në zyra, ndërsa gazeta “Lajm”, ka mbajtur  qëndrim skandaloz ndaj kësaj ngjarjeje.  

KUSH SHKRUAN PËR KRIMET NË GAZETAT SHQIPE TË KOSOVËS

Raportin për vrasjen dhe për varrimin e  policit elit, Triumf Rizës, në gazetën Express i ka shkruar gazetarja Sara Rexhepi. Mbulimi i ngjarjes nga e njëjta gazetare në kësi rasti është shumë më profesional dhe jep më shumë shanse gazetës që të ketë raportim më të plotë, sepse gazetarja ka më shumë informacione kur ka qenë e preokupuar me këtë ngjarje, nga fillimi e deri në përmbylljen e saj. Gazeta Express në këtë rast ka treguar shkallë të lartë profesionalizmi, sepse ka pasur edhe editorial nga drejtori ekzekutiv i gazetës, Baton Haxhiu, dhe një varg tekstesh në ditët në vazhdim. Kësisoj, më duket se Express i ka gjasat serioze që të ecën drejt profilizimit të gazetarëve që shkruajnë për krimin dhe që si gazetë të profilizohet dhe vetë me ndjeshmëri më të madhe profesionale ndaj këtyre ngjarjeve. Ky është një depërtim serioz profesional i gazetës Express. Minimumi është se ajo ka përfituar lexues të rinj, nga rinia urbane e kryeqytetit, të cilët edhe në marshin kundër krimit, me moton “Triumf gjithmonë me ty”,  që u mbajt më 4 shtator 2007, ishin me pjesëmarrje masive. 

Raportin për vrasjen e Triumf Rizës te Koha Ditore e ka shkruar gazetari Kasriot Jahaj, ndërsa raportin nga varrimi e ka shkruar gazetari tjetër, Zija Miftari. Kjo do të thotë se kjo gazetë, e cila është e standardeve më të larta profesionale në Kosovë, i ka dy gazetarë të përgatitur për raportim nga ky sektor. 

Edhe gazetari i Inforpress, Bekim Kabashi i ka një prirje që të jetë gazetar i përgatitur për këtë sektor. 

Raportet në gazetën “Zëri” i ka shkruar gazetari Visar Fetaj, i cili shihet se shkruan brenda standardit asnjajës të kësaj gazete, shkrime rutinë, pa depërtime serioze profesionale.

Gazetat Bota Sot, Kosova Sot, Epoka e re në këtë rast zbulojnë se nuk e kanë as idenë se çfarë rëndësie ka raportimi nga ngjarje të kësaj natyre e të kësaj peshe, ndërsa gazeta “Lajm”, duke e bojkotuar ngjarjen e varrimit të Triumf Rizës, ka ngritur dilema për profilin e saj, jo vetëm profesional, por edhe etik.

PËRFUNDIME

Nga analiza e këtyre raportimeve, nxirren këto përfundime: 

E para, disa gazeta shqipe në Kosovë, si Express dhe Koha Ditore, kanë filluar ta kuptojnë rëndësinë e ngjarjeve të tilla, pra, të krimeve që ndodhin e që kanë ndikim në disponimin dhe në qëndrimin e publikut. Gazeta Express në këtë rast është treguar gazeta më shkallën më të lartë të profesionalizmit, duke e mbajtur këtë ngjarje si top temën e vet, duke e mbuluar me raporte të gjera nga terreni dhe me fotografi autentike, duke e plotësuar edhe me një editorial shumë të veçantë të drejtorit ekzekutiv të gazetës e duke e pasuruar edhe me opinione  të lexuesve.

Gazeta Koha Ditore dëshmoi shkallë të lartë profesionalizmi dhe etike,  por me mobilizim më të vogël nga sa ka qenë realisht interesimi i publikut për ngjarjen.

Injorimi i gazetës “Lajm” ndaj kësaj ngjarjeje mbetet që të sqarohet se a ka motive jashtëprofesionale. Ndërsa, në planin profesional ajo këtë herë ka dështuar plotësisht.

Raportimi i gazetës Infopress është brenda kapaciteteve të gazetës, por me një tendencë të lehtë, që të  kuptohet më mirë rëndësia e këtij sektori në të ardhmen.

Raportimet e gazetës Kosova Sot janë as mish as peshk, raportim sa për të raportuar, pa qëndrim e pa nivel profesional. Dështimi i gazetës Epoka e re këtë herë është i lidhur me zhvillimet brenda redaksisë së saj, ku kanë ndodhur ndryshime të redaktorëve e të gazetarëve bash në këtë periudhë.  

E dyta, shumicës së gazetave u mungojnë gazetarët e specializuar për raportime nga ngjarjet e tilla. Ato mbulohen nga gazetarë që punojnë në sektorë  të tjerë, gjë që e ulë kualitetin raportimeve. Vetë fakti që gazetarët që kanë shkruar për këtë ngjarje, nuk kanë sjellë asnjë përvojë të tyre nga bisedat ose njohjet me viktimën, tregon se ata nuk janë të specializuar për raportime në këtë sektor, sepse po të ishin, do të ishte e pamundur të mos kishin njohje e përvoja me policin Triumf Riza, i cili  ishte simbol i luftës kundër krimit në Kosovë.  

E treta, ajo që është imorale, ka redaksi që ngjarjet e tilla i mbulojnë me lajme të kompiluara, pa pasur gazetarë në terren.

E katërta, ka edhe raste të shëmtuara, kur një gazetë e ka heshtur krejt ngjarjen, varrimin e Triumf Rizës, ndërsa në ditën e pestë pas vrasjes, botuesi i gazetës i dërgon telegram ngushëllimi familjes së viktimës!!! Qoftë dhe vetëm ky rast, tregon se disa media nuk janë plotësisht në shërbim të informimit, por në shërbim të promovimit të botuesit që ka projekte partiake. Bile nganjëherë edhe të përpjekjeve për të fshehur lidhjet e mundshme të biznesit e të politikës me kriminelët e identifikuar.      

E pesta, shumica e gazetave nuk kanë strategji të qarta të ndikimit mbi opinionin publik, por vetëm informim rutinë. E vetmja gazetë në këtë rast, e cila ka ndikuar në formimin e opinionit për krimin dhe në mobilizimin qytetar kundër krimit, ka qenë gazeta “Express”.

Fakti që disa gazeta kanë shkruar për këtë ngjarje dhe rreth kësaj ngjarjeje më gjerësisht në ditën e pestë dhe në ditën e gjashtë pas krimit, se sa në ditën e parë të krimit tronditës, tregon se planifikuesit e temave në ato redaksi, kanë dështuar plotësisht dhe nuk e kanë të qartë rëndësinë që ka mbulimi i temave për krimin. Kjo do të thotë se vetë redaktorët e atyre gazetave duhet të trajnohen e pastaj të profilizohen gazetarët që do të shkruajnë në këtë sektor të ndieshëm. *

E gjashta, gazetarë në këtë sektor nuk duhet të jenë fillestarët, por emra të njohur të gazetarisë, sepse përvoja dhe fama e tyre i bën në depërtues në hulumtimin e krimit dhe të rrjeteve të tij, po i bën edhe më të mbrojtur karshi kriminelëve.

Dhe e fundit në këtë mes, pa gazetarë të guximshëm e të specializuar për raportimin e krimeve dhe për hulumtimin e krimeve, lufta kundër krimit në një shoqëri, nuk është kurrë e plotë.     

(*Tri televizionet nacionale, RTK, KTV dhe RTV 21,  i kanë dhënë hapësirë të dukshme raportimit për këtë vrasje. Por, këto media nuk janë objekt  kësaj analize.)

9/8/2007 - NA DUHESH TIM SHKUPI !

9/12/2007 - BOLL MA! (Apeloi Adelina qe nga viti 2001)

9/14/2007 - BOLL MA

9/19/2007 - LETER E HAPUR PACOLLIT NGA BABA I TRIUMF RIZES

10/30/2007 - hey kjo osht veqant veq per adelina ismajli

11/26/2007 - Untitled Comment

1/9/2008 - ffiss

1/9/2008 - Gjithmone me ty Triumf Riza

1/12/2008 - e pa zavendsueshmja

1/15/2008 - Nfvzgsd

1/15/2008 - Komentet me lart!

1/18/2008 - Untitled Comment

1/22/2008 - Untitled Comment

1/31/2008 - TUNG

2/5/2008 - "Arti" shqiptar kontrollohet nga mafia.

2/14/2008 - ylli esrades adelinaa

2/14/2008 - shpresojm nje gje nga adelina

2/14/2008 - pershendetje. Adelina Ismajli

2/16/2008 - Adelina the best

2/16/2008 - Untitled Comment

2/18/2008 - respekte

2/19/2008 - no coment

2/19/2008 - Untitled Comment

2/21/2008 - ADELINA T"PERSHNDES TI JE YLL BOTE

2/21/2008 - tung

2/21/2008 - tung

2/23/2008 - Untitled Comment

2/24/2008 - pershendetej nag nje nxans ne turki

2/27/2008 - dgddgddgg

2/27/2008 - dgddgddgg

2/28/2008 - feta

2/29/2008 - iliri nga gjakova

3/7/2008 - vesa

3/8/2008 - bukuroshe

3/10/2008 - Tungi te gjithve

3/11/2008 - pershendetje

3/13/2008 - Pershendetje

3/13/2008 - Pershendetje

3/13/2008 - O TIM SHKUPI !!!

3/14/2008 - e verteta dot del ne shesh

3/14/2008 - Tosi_Drenica

3/14/2008 - keni

3/15/2008 - koment

3/17/2008 - Adelina ikone e luftes kunder se keqes...

3/18/2008 - Deliu

3/21/2008 - ok

3/22/2008 - helloo!!!!!!

3/23/2008 - Untitled Comment

3/29/2008 - tung adelina je divaaaaaaa estrades shqiptare

3/30/2008 - tung

4/2/2008 - adelin zoti te ndihmoft

4/5/2008 - tung adelina

4/6/2008 - tung

4/15/2008 - KRALICA E SHQIPTARISE

4/15/2008 - KRALICA E SHQIPTARISE

4/15/2008 - E PAVDEKSHJMA

4/15/2008 - E PAVDEKSHJMA

4/17/2008 - Adelina Ismajli dhe vrasja e Triumfit

4/18/2008 - tung

4/28/2008 - bina lena

4/29/2008 - adelina shtriga

4/29/2008 - adelina shtriga

4/29/2008 - ariana valentina

5/5/2008 - super

5/5/2008 - super

5/8/2008 - tung

5/15/2008 - mirdita

5/16/2008 - c'kemi

5/19/2008 - fotot e adelines

5/19/2008 - lule

5/19/2008 - lule

5/21/2008 - hello

5/22/2008 - Untitled Comment

5/22/2008 - tung tung

5/23/2008 - Untitled Comment

5/24/2008 - une hahhah

5/27/2008 - tung nga prizreni

5/28/2008 - Untitled Comment

5/30/2008 - deti

5/30/2008 - Untitled Comment

6/5/2008 - ola

6/5/2008 - ola

6/7/2008 - Untitled Comment

6/7/2008 - xemeeeeel

6/8/2008 - mimoza

6/10/2008 - heyy

6/10/2008 - tungi

6/10/2008 - tungi